長江後浪推前浪，喺香港嘅民主運動，明顯體現得到。繼登上《時代》雜誌封面人物後，啱啱踏入18歲嘅學民思潮黃之鋒，再下一城被《時代》雜誌選為2014年最具影響力嘅年輕人，同剛剛獲得諾貝爾和平獎嘅巴基斯坦17歲少女馬拉拉、美國總統奧巴馬兩位女兒Sasha、Malia齊名，為香港爭光。
《時代》雜誌選出今年25位最具影響力嘅年輕人，當中大部份都係美國娛樂圈嘅名人，好似《勁揪俠》女星嘉兒莫蕊茲（Chloe Moretz）、美劇《Modern Family》嘅演員Rico Rodriguez。體育界方面，職業高爾夫球選手高寶璟、阿富汗國家單車隊成員Salma Kakar都榜上有名。
網上投票暫列第四
至於政界，成張名單寥寥可數，除咗包括為兒童爭取人權、女性教育嘅最年輕諾貝爾得主馬拉拉，另一個就係嚟自香港嘅黃之鋒。《時代》雜誌話呀，之鋒參與公民抗命，爭取普選：「對於某些人來說，他是希望的象徵、號召與他同年紀、擁有相當信念的人參加，但在中國大陸，很多人會認為黃是一個極端主義者，挑戰中國秩序象徵。」
《時代》雜誌仲喺網上舉辦投票，畀網民喺呢25位最具影響力嘅年輕人中投選一位。截止噚日下晝，已經有逾2萬人投票，國際知名嘅馬拉拉以33%，以大熱姿態排第一，之鋒都好巴閉，排喺第四。白宮兩位千金呢，得票率暫時只有1%咋。
李八方
twitter賬號：khcheung1