做政府公職通常有個不成文嘅6年限期，雖然狼英上場後，間唔中有例外出現，好似蘇澤光舊年就獲續任一年貿發局主席，做足7年，但係地監局主席陳韻雲（Vivien）就跟番呢個不成文規定，將於本月底卸任。
Vivien最為人所熟識，就係佢本身熱衷投資超級豪宅，最矚目就係今年以5.38億元買入和黃（013）山頂白加道28號3號屋。佢噚日話，親身去呢間屋睇過兩次，覺得個維港景觀真係無敵；加上佢本身喺白加道住緊嗰間屋都有8年咁耐，咁咪決定買入呢間自住囉。至於住開嗰間屋點處理呢？佢就話「嗯……我都未諗」。
Vivien做咗地監局主席6年，佢認為令佢最感自豪嘅事，就係成功推動二手樓用實用面積報價，其他難忘事包括港島The icon事件，行內一般認為呢件事促使一手住宅物業銷售條例誕生。
講到新主席，佢半點風聲都唔肯透露，只係預告新主席比佢更嚴厲。一眾代理要醒定啲喇，Vivien任內，有51名地產代理被當局釘牌。