朋友話，打高爾夫梗係落真草場先夠豪氣，等於話阿媽係女人，係人都知啦。若嫌揸車太耐，又畀唔起天價入會費，倒不如去近近哋嘅市中心模擬場玩。好似新開的GreenLive Club，就引入超巨型100吋3D模擬器，並提供約400個CG場地，連天氣變化、早上黃昏都由你決定；活潑貪玩嘅7歲高球小天后劉弦（Arianna）落場試打，聽住雷雨交加仲越玩越興奮，但如果落到真場先嚟落雨，當然無晒mood啦。
記者：陳國輝
攝影：劉永發
呢套模擬器最巴閉之處，正是安裝在天花嘅兩組感應裝置。咪睇佢貌似CCTV，呢個系統由韓國研發和引入，據講萬人迷阿Rain屋企都裝咗一套！不過，呢度收費比起一般每小時約$200嘅價位稍高，好消息係新場附設5條發球道全屬免費，新手落場不妨去體驗吓。
人仔細細，剛滿7歲嘅Arianna，揹住一個裝咗8支球桿、約十多磅重嘅裝備進場。「平時練習多數自己揹，唔重㗎！」當然，並非每個人都咁專業，你亦可兩手揈揈就進場，享用場地提供嘅球桿和手套，每間房仲設有電視，周末睇吓英超，吹吹水，感覺很中產。「模擬高球場仲唔使擔心天氣情況㖭，幾時都去得。」Arianna說。
即場玩 唔使8分鐘入洞
小天后當然唔會摸住杯底同你講人生，拎起球桿立即進入認真mode。揀選過程有啲似打機，分為比桿賽（Stroke）、比洞賽（Match）以及推桿（Putting）等模式，下一輪就係揀場地、時間和天氣等參數；到正式開波，那100吋畫面極震撼，Arianna懂操控panel，不停360°觀察地勢環境，入第一個洞嘅時間唔使8分鐘，幾桿完成。
嘆住冷氣，又鄰近市中心，咁樣打golf梗係舒適，但作為專業訓練，Arianna導師也大讚呢套系統數據詳盡，頗具實用性。鄭教練話：「天氣因素對球手影響好大，尤其球速、方向，就算落到草地，移動軌迹亦會變；因呢套系統可隨時更改天氣情況，絕對有利集中訓練。」教練話由於球桿軌迹、撞擊力度，以至倒旋等都可化成數據，再加上可以playback，因此能幫Arianna改善姿勢。
逼真環境逐一睇
以前玩嘅所謂3D模擬，全靠闊銀幕帶出逼真效果，感覺似乎太單一，但呢部由韓國Golfzone引入嘅室內高爾夫模擬器，就連當地國家隊成員都用嚟練習，究竟有幾逼真？即睇。
超多球道
系統有約400個場，包括最出名嘅聖安德魯高球場。據講CG環境採用航拍方式，再結合GPS技術而成，故此環境地形超逼真。
升降地台
斜地台上練習非首見，但全由電腦控制又見過未？地台根據高球落地位置，結合實地環境，適當地升降或傾斜，左右或前後傾側都冇難度。
三種草質
模擬練習場多數會喺草道（fairway）進行，但此系統提升逼真度，加了沙坑和長草兩種區域，更切合真實環境之餘，對喜歡挑戰高難度嘅玩家亦係好消息。
GreenLive Club
設備：10部3D高球模擬器、5條發球道、提供手套及高球桿服務
地址：荔枝角長義街D2 Place一樓114-127號舖
費用：每小時$500
模擬Golf場大搜查
落真草高球場，一係入會費貴到嘔，一係就偏離市中心，要揸車先去到。不過，鄰近市區嘅模擬場仍有大把選擇，放工後跟同事打番幾小時，嘆冷氣吹吹水，都咪話唔爽。
Golf Laboratory
提供基本球道、GC2球道以及GC2私人球道三種，另有Putting Green（練習果嶺）場所，讓玩家試打真實嘅推桿入洞，唔使一味對住個芒玩。
地址：太古船塢里8號華廈工業大廈9樓B室
費用：每小時$200起
City Links Golf Hong Kong
睇地點估到，佢係專為高級白領而設嘅Golf場。入面有4條私人球道，仲提供lounge bar兼可以訂場開私人派對，摸住酒杯底打波，好中產喎。
地址：中環雲咸街60號中央廣場10樓
費用：每小時$290起
Leader Golf Training Centre
這裏不設綜合收費，只將球場模擬訓練系統、普通打球，以及影像分析儀作為獨立收費項目；另設坡度練習台，可自設不同難度，任你自由發揮。
地址：香港仔黃竹坑道23號標達中心5樓
費用：每小時$45起