電視機播着警察清場，恒指係咁飆，以為大奇蹟日再現，點知未清完個市又隊，埋單跌95點，如何解讀？正路如淡友敗走，好友揸𨋢，以恒指9月以來的跌幅，起碼挾番500點吧！豈料恒指補番上周五下跌裂口後，即時掉頭回落，反映呢劑係挾高指數開淡倉，仲要即日插落day low收咁滯，陰陽燭呈「垂死十字」，聽個名都知大鑊！
睇埋外圍，道指、納指、標普全線急瀉，油價創四年低位，聯儲局本月料結束買債，歐央行QE未有聲氣，IMF近月三降全球經濟增長預測，阿爺呢兩日亦開始放風，明年GDP隨時保唔到七，就知道港股內憂外患，造落點都易過砌上，總之，唞一唞，勿多手。
欄友孫柏文話自己清咗倉，清倉即係一股都冇，意味對後市睇得好淡。零持真係好易，但日日對住個市，當個市來個小反彈，係咪可以忍手唔買？忍咗半晝，午市再挾，炒開股票嘅人，市升自己冇份，慘過俾人凌遲。忍唔住追番兩隻，又插過，點搞？據魏力無數次清倉再追到氣咳的經驗所得，留兩隻防守股測市，通常有意想不到的效果，除日前講的領匯（823）外，長建（1038）亦可考慮。
魏力
http://www.facebook.com/2012jason