重慶國資委網站重點企業當中，排第一嗰隻，就係慶鈴汽車（1122），食住地區發展國策，加埋環保條例，慶鈴掂過碌蔗。
慶鈴係重慶市重點企業，啱啱喺最新嘅今個半年度業績，純利增長咗30%，到2.4億銀人仔。慶鈴成績單脫穎而出，主要係集團把握住祖國即將實施商用車，由國三去到國四嘅排放標準，增加營銷網同提升產能，主打嘅輕型商用車，同中、重型商用車兩瓣，全部報捷。兩個項目嘅分部溢利，增長咗47%同1.3倍，去到9,440萬元同6,000萬元人仔，確實係靚仔到爆。
超級現金牛可攻可守
由於國四排放標準喺明年1月落實，所以，相信慶鈴喺嚟嘅緊日子，繼續食住呢個環保政策，今年全年成績單，應該係繼續有運行。又重慶市係長江流域同絲網之路兩條經濟帶嘅支點。呢兩條經濟帶，又係重中之中國策，而前邊長江流域經濟帶，更加提升到國家戰略層面。連同中西部大開發，重慶市享受到地區特有優勢，慶鈴亦有望近水樓台，中線少少睇，長搵長有。
咪扯咁遠，場內專業評估，慶鈴今年純利4.2億銀人仔，增長近15%，每股純利0.22港銀，預測PE得10倍。又慶鈴上年每股派息0.163元，現價（2.34元）嘅息率回報，上到近7厘。諗到嘅係，集團今年純利，只要keep住溫和增長，已經可以維持呢個高息。再講，慶鈴揸住淨現金，高達48.6億港銀，係家陣總市值60億銀嘅81%，超級現金牛，既可攻又可守。
買慶鈴，去到3蚊計數，升幅近30%，預測PE先睇齊家陣PE水位，又目標價嘅息率回報，仍然高達5.4厘，邊有耐升過龍？
錢雋
細價股專家
本欄逢周二、三、五刊出