家陣樓價貴，按揭限制又多，後生仔想做業主，好多時都遙不可及，不過有個富爸爸就唔同講法。好似馬主關百豪，近日就購入一個2,200萬嘅北角新盤柏傲山，係大約900呎三房單位，原來佢協助兒子「上車」喎，呢個慈父真係唔話得喇！
關百豪咁疏爽，當然因為水頭充足，佢嘅時富系上市公司，據知可能獲天津一間國企入主，形勢一片大好，所以買樓畀個仔濕濕碎啦！
股壇得意之外，關百豪亦養正兩匹實力馬，「魚躍鳥飛」上季尾三連捷，質素深不可測，雖然今季開操較遲，暫時仲未能上陣，但另一匹愛駒「如你所願」就已經準備就緒，將會喺今期上陣，呢匹馬堪稱泥地怪傑，泥地贏過五場，其中今次所角逐嘅泥地一哩，跑兩次得一冠一季百分百上名，今場排正個一檔，可以全程慳位慳力，加上騎師羅理雅鬥志十足，睇嚟「如你所願」都可以幫補吓關百豪買樓嘅支出！