兩位政黨女揸fit人，民主黨主席劉慧卿同新民黨主席葉劉淑儀，噚日去FCC演講佔領運動，葉劉繼續話佔中無助香港走向普選，批評學生要求狼英下台同人大收回決定不切實際。
有港台英文節目記者向葉劉挑機，問佢支持立法會調查佔中，查實有乜理據？葉劉直認冇任何實質證據㗎，又話唔想引起外交風波，但觀察到灣仔有好多「有組織活動」，包括有貨車向佔中者運送物資、示威者獲得嘅食物同補給品比警察仲好，加上有市民有效率地將政府路障運去銅鑼灣和旺角，仲使用「先進科技」喺警方封閉金鐘道通訊系統後溝通，「背後有很多成熟的組織，所以立法會應該調查」。
八方斷估葉劉所指嘅「先進科技」，唔會係人人都可以下載嘅FireChat嘅手機App啩？真係知就笑死、唔知就嚇死咯！