最近的新聞毫無常識可言，笑到你死。
笑話一：關公像係黑社會拜的。
話說警察要清走旺角佔領區的關公像，理由是「因為關公像是黑社會拜的。」
阿Sir，全香港睇過港產片、見過李修賢做戲，都會知道，差館都有拜關公。黑白兩道，都視關二哥為守護神。箇中道理，我諗連杜琪峯都解唔到。
關公並非黑社會專利，全港差館供奉了多少關帝像，阿Sir唔通又係黑社會？難道只許黑社會拜關公，不許其他人上炷香？那麼阿Sir，你是否要盤問關公：「關公，你係咪黑社會？唔好扮嘢，好人好姐拎住把大關刀出街做乜？唔通你又鍾意食水果？阿Sir話你兩句就臉紅，係咪想打人啊！」
笑話二：你係咪黑社會？
警方近日經常派出反黑組巡視佔領區，但反黑探員總是在鏡頭前頤指氣使：「喂喂！你係咪黑社會？」
阿Sir，我哋問你哋嗰啲無戴委任證而混入人群嘅便衣「你係咪警察」，佢哋都死口唔認啦，不過最後由警察開路保護離開，你懂的。你今日周街對住鏡頭問人「係咪黑社會」，我諗連暴龍哥條𡃁林雪咁蠢都唔會認囉。
笑話三：市民可以去麥花臣遊樂場示威。
政府拒重開政總的「公民廣場」，反建議市民到海濱長廊、維園、麥花臣遊樂場示威。去遊樂場示威？你不如叫市民去渡假村示威？Book埋旅遊車去迪士尼同海洋公園示威？政府，你可以無恥漠視民意，但不要醜化民意，你以為民眾上街爭取民主是去遊樂場玩耍的嗎？
笑話四：蘋果被包圍只出到A叠。
歷史罕見，一份報紙被惡勢力欺壓得只趕得及印刷頭版出街……但一份報紙最有力量便是頭版啊！畀維穩費嗰啲，呢次做了虧本生意了。