關正傑的金曲《恨綿綿》、《一點燭光》、《詠梅》都出自著名填詞人鄭國江筆下，他接受電話訪問說：「我哋合作好多，佢非常正氣，好難得一位歌手，到現在為止，未有一把男聲好似佢高低音都咁從容，佢歌路好闊，言情說志都駕馭得非常好，我係第一個幫佢填廣東歌《我心喜歡你》，之前佢一直唱英文民歌，覺得唱廣東歌好尷尬，但出嚟感覺好舒服。」
至於為關正傑填《在原野上》、《願我永遠不用想你》的林敏驄亦大讚：「關正傑好勁喎！嗰時我啱啱入行，得十幾歲，寫親乜佢唱都hit。」問跟關正傑合作會否很緊張？他笑說：「唔緊張喎！佢好隨和，成日笑，哨哨哋牙，好可愛，佢性格好開朗好正經，雖然冇乜講笑，但好正能量。」