唔少財金界人士雖然平日工作繁忙，但都會盡量抽吓時間做運動。好似楊海成嘅外甥、實德環球（487）副主席馬浩文（Hoffman）就好鍾意踩單車，仲以公司名義贊助咗隊單車隊叫「Success EZ Rolling」參加比賽，仲成日有獎攞㖭。
41歲嘅Hoffman以前係「波牛」，好鍾意踢波。不過佢笑住話，「年紀越大，骨頭就越脆弱，試過踢到鎖骨同腳趾斷骨」，喺醫生叮囑下，約喺4、5年前，佢就轉咗玩單車。現時佢每星期都盡量抽時間踩足3日車，除咗一般公路賽外，仲專登考埋場地賽嘅牌照。
佢話踩單車可以買唔同裝備，踩得唔叻都可以賴裝備唔夠好。現時佢有六架「戰車」，最貴嗰架仲已經放咗成十幾萬落去，認真揼本！