超人李嘉誠為支持維港投資，唔單止出錢咁簡單，更加撥出時間，為維港早前舉行亞洲巡迴展覽，首次親身上陣拍片。
成條片全長2分24秒，主要介紹維港嘅投資項目，超人喺尾段現身，坐喺辦公枱前。雖然佢只係出鏡20秒，得六個分鏡，但據聞，單係呢一段，就拍攝接近兩粒鐘，主要係因為燈光師用咗唔少時間set燈，日理萬機嘅超人當然唔會齋等，一路做自己嘢，一路等埋位。
講番條短片，內容講兩條毛毛蟲相遇，其中一條希望可以飛，但就俾另一條取笑。呢條毛毛蟲最後真係蛻變成為蝴蝶，仲飛入超人喺中環長江中心嘅寫字樓。
之後超人仲自己做埋VO，用普通話讀出《小王子》入面幾句：「創意教育，不僅要令人有造船的技巧，更重要是啟發大家對揚帆出海的無窮嚮往。」