資深傳媒人左丁山曾經喺專欄為之前喺太古廣場嘅意大利餐廳Domani抱不平，指業主太古地產（1972）因為計劃進軍飲食業而收番Domani個舖。俾佢咁樣講一講，華華反而留意太古會喺度搞一間點樣嘅新餐廳，既要搵新客，又要吸番Domani班舊客。
呢間新餐廳The Continental噚日靜悄悄開張，主打英國菜，再加少少法國菜式，由太古地產旗下太古酒店經營。太古屬英資公司，開間做英國菜嘅新餐廳都算係合理，喺英國嘅董事第日來港開會，都可以食番餐地道菜。
一間餐廳，最緊要當然要睇邊位係廚房嘅話事人，太古搵嚟一路有幫英國《金融時報》寫飲食專欄嘅英國名廚Rowley Leigh做顧問。
要講英國名廚，港人最熟識嘅，當然係經常喺電視教煮餸嘅Jamie Oliver喇，64歲嘅Rowley就走唔同嘅路，做廚師都係無心插柳。佢劍橋畢業後，曾經走去寫小說，七十年代尾無意中見到有餐廳請廚師，佢覺得自己鍾意煮餸，走去應徵，咁就入行幾十年。
佢1998年開始寫飲食專欄，喺《金融時報》都寫咗10年。新店開張，據聞佢會留港幾個月，唔知左丁山有無興趣會一會佢呢？