「超人」李嘉誠嘅紅顏知己周凱旋（Solina）係維港投資掌舵人，經常接觸新事物，但一身打扮卻樸素得出奇，好多時都係一套黑色套裝，配飾亦一啲都唔誇張。如果大家細心留意，會發現Solina每次公開露面，耳珠上都有一對珍珠貝殼耳環，風雨不改都戴住。
芝麻街公仔做心口針
網上一直流傳，呢對耳環係Solina早年喺香港打工時，用一個月人工買下嘅心頭好，當時佢每次經過首飾櫥窗，都應承自己要下決心發奮上進，希望有一日可以擁有。之後Solina越來越成功，索性請珠寶設計師，一次過做出10隻一模一樣嘅珍珠貝殼耳環，輪住喺周一至周五佩戴，周末先喺右耳戴上另一款耳環。
華華早前參與維港嘅巡迴展覽，向Solina提到呢個故事，佢面帶微笑咁話，「第一對，一早唔見咗，差唔多30年前，好平，但係我好鍾意」。Solina今年53歲，即係話，佢23歲戴呢款耳環戴到𠵱家，認真長情。
除咗珍珠貝殼耳環，Solina另一款招牌首飾，就係西裝褸扣上嘅青蛙公仔Kermit（芝麻街一隻布偶公仔，1955出世）。佢話「我好鍾意Kermit，所以成日都戴住」，雖然呢個Kermit心口針睇落閃令令，但Solina就話唔係水晶，仲話只係「朱義盛」嚟咋。
同喜歡用macbook嘅超人一樣，Solina亦係一名蘋果粉絲，正當大家仲係一機難求，佢已經手握一部金色版iPhone 6喇。
李華華
mailto:[email protected]