恒地（012）主席李兆基（四叔）近排買股好疏爽，除大手增持恒地，就連世姪嘅新地（016）都關照埋。
根據聯交所資料，新地9月12號（周五）公佈業績，四叔就喺之後嘅星期一掃貨，直至上周二，累計大拿拿拎咗15.6億元增持，相對佢8月底至今用26億元買恒地，真係掃得好豪呀。
係人都知四叔與新地大股東郭氏係世交，早於上世紀六十年代，四叔同郭氏三兄弟嘅父親郭得勝，仲有馮景禧合資創立新鴻基企業公司，即是𠵱家嘅新鴻基地產，三人後來分開發展，四叔創立恒地，郭得勝繼續經營新地。
四叔呢兩個月積極增持新地，究竟係睇好股價，定係撐世姪就唔知。從長線投資角度睇，新地上月宣佈每股派末期息2.4元，以四叔𠵱家持股計，都可以袋超過4,100萬元，都夠四叔買玩具㗎。