雅居樂（3383）10月3日停牌，幾日後就傳出主席陳卓林「唔見咗」的消息。據基金界所講，當時雅居樂相關人士的電話，長時間處於無人接聽狀態；就算好彩畀你搵到公司，佢哋的答法係「唔知點解要停牌」。
由於雅居樂提供的資訊實在少得可憐，投資者驚到有得震無得瞓，其債券在OTC市場被喪掟。直至上周五雅居樂終出公告，證實陳卓林10日前已被「監視居住」後，公司昨立即「補鑊」，連開3場投資者電話會議解畫，任問唔嬲，其中一場更開足兩粒鐘。但此舉不足以挽回投資者的信心，雅居樂股價仍狂跌不止。
雖然股票急瀉，但雅居樂的債券昨日止跌回升，反映投資者對公司要「執笠」的預期有點緩和。聞說雅居樂的債權銀行，暫時仍相信事件係陳卓林的「個人問題」為主，雖然公司一筆4.75億美元的過渡貸款12月中就到期，但銀行一般無意「逼死」債仔，有關貸款很大機會獲得酌情延期。
只是，過到呢關，之後又點？仲有147億人仔短債等緊公司，其利息覆蓋率已跌到得2.7倍，非常接近需要警覺的2.5倍水平。在陳卓林一案被定性之前，雅居樂要再借新錢將極度困難。重啟供股？股價跌到咁，融資能力已大受影響。減價賣樓？沒問題，不過可以想像有很多沒有海外融資平台的細型地產商，其套現的逼切性更大，割價力度會更狠。無論雅居樂選擇哪一種方案，結論都係：未見底。
海迪