今年嘅生日對𤏸之鋒嚟講，必定好難忘，事關佢嘅18歲成人禮慶生活動，幾乎日日都有，連日相信食過N個蛋糕嘅佢，正日凌晨就同學民思潮嘅最親密戰友一齊喺金鐘度過。而佢收到最特別嘅一份生日禮物，梗係一本由學民成員同香港市民，一齊寫畀佢、內載祝福同鼓勵嘅紀念冊。
「希望年年冇今日」
之鋒話成年後首要做嘅事，就係登記做選民，「希望可以用選票踢走保皇黨」。佢噚日朝早喺商台節目仲展示咗嗰張登記表格。咁18歲有咩願望呢？佢百無禁忌話：「希望年年冇今日」，即係香港有普選，唔使再搞佔領抗爭啦！
查實佢話都希望可以「快啲返屋企食飯」，好掛住屋企張睡床，坦言有啲「對唔住屋企人」，因為由罷課至今嘅三星期，屋企人都冇乜機會見面，佢好希望家人、女朋友都幸福快樂。