如果馬匹有勤功獎，咁胡森馬房隻「紅褲仔」應該有份攞，呢隻馬今期將會角逐最首本嘅泥地1200米，唔經唔覺已經係佢季內第四次上陣。吓，馬季先開始咗一個月，跑得咁密咪好辛苦。冇辦法啦，鬼叫胡森兵微將寡咩。睇番上季胡廐成績已經唔達標，如果今季又再肥佬，形勢就好危。
其實胡森已經發憤㗎喇，今季佢嘅戰馬明顯鬥志鮮明，陣上唔整蠱做怪，好努力搏殺，可惜始終吸引唔到新血加盟，亦冇舊馬轉過嚟支持，繼續維持得19駒少得可憐，所以咪搞到搏來搏去都係「紅褲仔」囉。
好在呢匹馬非常生性，季內三戰攞到兩冠一季全上名，五歲英國馬睇嚟現階段先大熟大勇，今次再配好拍檔韋達，泥地1200米跑慣跑熟，落難嘅胡森莫非真係要靠呢個阿「仔」孭起頭家？