菲菲最近終於由三星回歸蘋果懷抱，原因有二，一係因為買咗兩部iPhone諗住炒，點之冇肉食，短炒變長揸；二係雖然認為Android功能勝一籌，但作為一個港女，手機影相質素實係最重要，所以睇在iPhone個冇得頂嘅鏡頭份上，決定重投蘋果。
消息指，為蘋果提供相機模組嘅韓國移動設備商高偉電子，已向港交所（388）遞交初步招股文件，集資2.5億美元（約19.4億港元）。高偉來頭唔細，去年市佔率約5%，列全球第六位，料2014年全年營業額中有80%來自蘋果。以今次iPhone 6反應咁好，內地三日內已有2,000萬部訂單，所以大家對高偉多加留意。
呢個市況亦要留意老牌紅籌，其中北大資源（618）可塑性好大。臨近四中全會，央企改革係今年重點炒作主題。之前已炒嘅有中航系及中國環投（260），今次輪都輪到方正系。
北大方正在港上市嘅，只有方正控股（418）同埋北大資源。噚日兩隻都靜極思動炒上去，證明炒作時機已到！絕對有跟炒嘅理由，分分鐘好似中航系咁炒到癲。
北大資源後台夠勁，更已被定性為母企旗下唯一海外地產上市平台，上月先公佈獲注入12個物業發展項目，未來阿媽實鼎力支持，有注資憧憬。
Fifi
http://www.facebook.com/lovefrystock
本欄逢周二、四刊出