內地體育用品股龍頭安踏（2020），繼8月搶走李寧（2331）嘅國家體操隊贊助，令體操王子大叫「很痛苦」後，近日再搶走另一行家匹克（1968）做咗至少7年嘅NBA中國官方合作夥伴頭銜。安踏獲授權未來可以喺中國使用NBA商標做宣傳，仲可以一齊用聯合品牌名義出產品。
安踏近來表現勢如破竹，最新訂貨會及同店銷售數字理想，股價再創新高，公司市值已經超過430億元，係匹克嘅十倍。
幾年前體育股集體插水，至今只得安踏可以叫做完全重返正軌。安踏最勁就係管理層出名好打得，老闆丁世忠被人形容為「醒字派」，平日出席分析員會議或記者會，如果在場人士冇做足功課或講廢話，丁世忠會唔客氣窒到你冇聲出；如果老闆係呢類型，睇怕下屬都好難唔打得囉。