行政會議成員陳智思自修操肌超過十年，早排參加泳賽大show四嚿腹肌，睇到人嘩嘩聲，原來唔少金融界高層都有操肌習慣，仲要係搵私人教練操，好似渣打銀行高層李文苑（Margaret）平時一身貴氣打扮，去到做gym都有板有眼；金利豐（1031）營運總監呂錦傑（Jammy）就坦言因貪靚而去健身打拳。
渣打銀行金融機構業部大中華及日本區董事總經理Margaret經常要周圍飛同客戶開會，原本約定佢上月中影相，佢突然要飛去日本，之後一個星期同佢電話傾偈，佢已經身在台灣，跟住佢又話要飛北京。飛得咁密，邊有時間做運動呢？
渣打Margaret：練腹背肌
Margaret都話，經常出差令到自己飲食好唔正常，加上平時成日坐喺辦公室，對住部電腦，膊頭好自然縮起；而且年紀越大，肌肉開始唔夠強，身體隨之而變彎，「有日喺街踫見朋友，半年冇見，見對方大隻咗，一問之下，原來對方走去跟trainer做運動，於是就走去試」。
Margaret今年7月開始去跟教練健身，每星期兩小時，主要做拉筋，佢希望將背肌與腹肌鍛煉得結實啲，最重要係，跟教練學識拉筋動作後，佢出差可以自己做。幾個月下來，佢發覺的確比以前精神咗，心情都靚埋。
金利豐Jammy：想變型啲
介紹Margaret去健身嘅，就係金利豐Jammy。佢今年45歲，去健身中心做運動超過十年，但認真跟教練就係今年3月嘅事。佢跟咗教練先知道，原來之前自己做健身器械完全用錯肌肉，「好似嗰部夾胸嘅butterfly機，應該鍛煉胸肌，自己用晒手臂力去夾，做錯都唔知」。
佢現時每星期做4小時健身，大半年減走十磅，𠵱家重143磅，佢坦言，「最想係練出線條，型型哋咁」。老生常談係運動有助減壓，Jammy認為都有幫助，有時工作想唔通走去健身兩粒鐘，放鬆心情，工作更快手。佢最近仲踢埋「金勞詹」詹培忠嗰位44歲嘅公子詹劍崙入會㖭。
教練「風之子」每小時收費千元
搵健身教練單對單上堂嘅學費有平有貴，一般係每小時幾百至1,000蚊，出名嘅教練每小時兩、三千蚊都有。百利保（617）董事范統出名鍾意打拳，佢與李文苑嘅教練係世界級拳手「風之子」杜恆霖（Bryan），Bryan每小時收800至1,000蚊，不過佢現時忙住自己間健身中心嘅生意，兩年前喺中環開地舖後，早排喺銅鑼灣再開多間，𠵱家都好少收新學生嘞。
李華華
mailto:[email protected]