臨近年尾，打工仔想轉工通常等埋過年，攞埋花紅先，不過亦有例外。喺財資界有超過30年經驗、不時評論滙市嘅中信銀行（國際）司庫陳鏡沐，聽聞本月底就會離職，稍後跳槽去渣打銀行（香港），擔任渣打環球市場主管，即係接替早排因集團重組，而調升渣打台灣行政總裁嘅陳銘僑個位。
陳鏡沐八十年代中喺香港大學畢業，佢喺信銀國際工作大約6年，之前先後喺滙豐、大新銀行（2356）嘅財資交易部任職。佢同陳銘僑差不多時間投身財資市場界，兩人都屬於行內資深嘅財資從業員。陳鏡沐對傳媒十分友善，不時分享佢對息口、滙市嘅睇法。
因應渣打業務重組，原本喺渣打銀行（香港）做環球市場主管嘅陳銘僑，今年4月初調咗去寶島，出掌渣打台灣行政總裁，佢個位暫時由渣打北亞區財資市場主管Gene Kim兼任。陳鏡沐過檔渣打後，就會向Gene Kim滙報。
業界指，人民幣業務同埋交易品種喺香港發展得越嚟越旺，近年銀行交易室都需要增加具備跨境業務經驗，同埋熟悉大中華財資市場嘅專才，求才若渴。