近年PS同XBOX不斷推出新主機，任天堂的粉絲當然葡萄。但是苦候三年，終於等到你了！最新推出的掌上遊戲機New Nintendo 3DS（細芒版）及New Nintendo 3DS LL（大芒版），焦點肯定是它們的裸視3D效果、屏幕感光度與操作方式有何改良。當日我們即拆即玩同日發售的新「芒亨」《MH4G》，新舊對比，整體表現真係唔錯，尤其裸眼體驗，更加舒服！
記者、攝影：陳國輝
兩款新機，原定10月11日面世，結果一如既往提早兩日登陸旺角信和。最抵讚係四色齊備，包括灰黑及白色的細芒版，還有灰黑及藍色的大芒版。售價方面，新官上任當然比定價貴一截，可幸未算離譜，大細芒版本分別標價$1,980及$1,780，較官方定價18,800日圓（約$1,350）及16,000日圓（約$1,150）貴$630。而讓大家最興奮的，肯定係同日發售嘅芒亨限量版New N3DS LL，連遊戲及刻有筆頭紋章logo的鋁合金機殼，信和首日高開$2,890，較定價激炒過千元！
試玩《MH4G》 3D體驗更舒適
兩款新機的詳細規格及功能，相信大家在網站都八咗唔少料！所以，記者更想簡單講吓現場試玩感受，其中，今代力谷嘅畫質確實有大幅改善。最明顯係，開機時鏡頭會事先掃描，原理就好似玩Kinect咁，成功掃描後，鏡頭就會追蹤你嘅身體擺動，所以就算打機打到周身郁，裸視效果仍可保持最佳效果！另外，鏡頭側邊新增光源感應，無論你走出戶外抑或走入室內，畫面光度都會自行調節。
現場試玩《MH4G》，睇opening嗰陣，記者嘗試左右移動機身，發現裸視效果如常，唔似舊版咁稍為偏離都覺得頭暈眼花。若果比較3D效果，則明顯感覺到新機畫面較為光亮，畫質更加實淨，表現有所進步。
新舊比拼：小改進有驚喜
如果有人話呢對老任「孖寶」有PS4或Xbox One嗰種革命性躍進，你都唔會信！對粉絲而言，呢三年真係等得太耐，還好新機已經叫有交代，特別係畫質、操作上都有改良， 同時新機強化了CPU效能，藉此應付未來對硬件要求更高嘅3D遊戲！此外，老任真係好識冧客，白色細芒版特別推出超懷舊四色按鍵，仿效當年SFC的經典設計，超有親切感。
電氣良品
旺角信和中心M19號舖
New N3DS/New N3DS LL
畫面：3.88吋裸眼及3.33吋輕觸屏/4.88吋裸眼及4.18吋輕觸屏
體積：80.6 × 142 × 21.6mm/93.5 × 160 × 21.5mm
重量：約253g/約329g
遊玩時間：3.5至6/3.5至7小時
顏色：灰黑、白/灰黑、藍
上周末售價：$1,780/$1,980