為達到理想就要有犧牲，喺地球另一端嘅西班牙，加泰隆尼亞自治區有訴求，最近醞釀搞獨立公投。位於呢個地區嘅巴塞隆拿，就算要脫離西甲聯賽都在所不惜，日前官方表態支持獨立。
簽加泰隆尼亞自主契約
上個月蘇格蘭獨立公投最終唔能夠成事，令英國政府鬆一口氣；最近輪到西班牙頭痕，加泰隆尼亞地區早排提出，會喺下個月9號進行獨立公投，中央政府即時作出阻撓，講明公投係違法，向憲法法院申請釋法阻止獨立公投；加泰隆尼亞預計會喺月中決定，係咪堅持進行呢個爭議性嘅獨立公投。
喺事情未進一步明朗化嘅時候，西甲球會巴塞隆拿喺上周五官方宣佈，簽訂咗加泰隆尼亞自主契約（Catalan National Pact for Self-Determination），據講到𠵱家已經有超過3,500個團體簽咗契約，支持獨立運動。
目前喺加泰隆尼亞地區有兩支西甲球隊，就係巴塞隆拿同埋愛斯賓奴，一旦獨立成事，兩隊亦會失去西甲參賽資格；冇咗巴塞呢支勁旅，對聯賽打擊非同小可。西甲賽會主席迪巴斯喺上星期表示：「我唔相信加泰隆尼亞獨立會成事，不過如果真係有咁嘅情況，根據足總明文規定，唔屬於西班牙嘅球隊係冇資格參加國內賽事。」
其實喺上月加泰隆尼亞嘅「國家日」，巴塞主席巴杜美奧同中場老大哥沙維都有上街慶祝，用行動去表態；沙維早前代表西班牙國家隊比賽，已經有唔唱國歌同綁上紅黃帶嘅舉動，佢話：「我哋有權去投票，亦有咁嘅需要，我一定撐公投。」球隊喺今季嘅作客球衣亦用咗紅黃間款式，亦即係代表加泰隆尼亞嘅顏色。
或學摩納哥戰法甲
巴塞一旦被踢出西甲咁點算？加泰當地有報道話，巴塞有搵法甲賽會話事人傾過偈，討論加入法甲嘅可能性。加泰隆尼亞接壤法國，而法甲𠵱家亦容許唔喺法國境內嘅摩納哥參賽，所以呢個構想雖然幾離奇，但絕非天方夜譚；一季至少有兩次巴黎聖日耳門對巴塞，都幾有睇頭㗎。
識睇，一定係睇足英台【英波Live】：
http://soccer.appledaily.com
http://bit.ly/engballlive