【雨傘革命】男神黃子華繼大前晚在棟篤笑《唔黐線唔正常》哽咽大讚香港人光明磊落後，前晚他在紅館繼續談佔中為港人發聲，雖未有再哽咽提「光明磊落」，但就引用了日本作家村上春樹的雞蛋與高牆論，籲一個學生也不能受傷。
寸特首公關技巧差
子華說：「我哋一向講，雞蛋，高牆，我好希望提醒一下，我哋今次唔係雞蛋與高牆，我哋今次係雞蛋撼高牆，高牆後面仲有一座山，我哋面對係呢樣嘢。呢句說話係由村上春樹講出嚟，各位，喺雞蛋高牆之間我哋一定選擇站喺雞蛋嘅一邊，但大家唔好搞錯，無論村上春樹，或者我哋任何人，都唔希望見到，有一粒雞蛋係粉碎，係咪？我希望我哋香港人有咁嘅智慧。我哋有仁，有勇，我希望我哋都有智慧，去保護我哋自己，不用一粒雞蛋粉碎，好唔好？」全場報以熱烈掌聲。
上月28日，警方發放了87枚催淚彈鎮壓學生，子華前晚問在場觀眾，可知道為何當日警方只發放87枚催淚彈，繼而他再拆解箇中因由說：「點解87就停呢？因為，你再發，就88；再整多支，就89㗎喇喎。89係一個好敏感嘅數字，冇人想記起89有催淚彈，同埋89又會令你記起689。唔好提醒佢，唔該。」
子華又提到特首若懂得公關技巧，市民根本無需要跟警隊對抗。子華說：「人民同警隊點會唔係一家人呢？警隊係專業嘅，但係用催淚彈係唔專業。大家諗一諗，過去香港幾十年發咗幾多次催淚彈？平均廿年都冇一次，你廿年都冇煮一次餸，你敢認大廚？你廿年都冇煮一次餸，咁你肯定係業餘㗎喇，咁你上次落多咗鹽，係可以原諒㗎嘛？所以警隊佢哋發催淚彈，係一時多咗，因為佢哋係業餘㗎嘛！」子華整晚妙論，引得台下掌聲響不停。
撰文：魯吉
