一年一度嘅維港渡海游噚日舉行，舊年有幾名立法會議員參加，今年唔多覺議員嘅身影。
事先張揚報咗名嘅公共專業聯盟梁繼昌同民主黨胡志偉，雙雙甩底，原因係因為呢排日以繼夜參與佔領，加上狼振英被爆收取澳洲財團UGL 5,000萬元巨款，泛民要聚精會神研究點狙擊。志偉話呀，如果唔係有人提返，佢連呢個賽事都忘記咗，噚日考慮到狀態麻麻，都係放棄算數！至於上屆有參加嘅自由黨鍾國斌，今年亦無落水露肌肉。佢早前講過，因為大會今年要求參加者繫上安全浮泡，佢覺得怪怪哋、亦擔心造成阻礙，所以冇報名，佢噚日向八方透露，查實一早為今年嘅比賽添置新裝，可惜未能大派用場。