跑馬咁多年，馬迷都知道1000米直路賽大利外檔，內檔馬再叻都唔易有運行。今日第三場正好印證呢個情況，內檔馬全軍覆沒，反觀外檔馬卻包辦三重彩，13檔「名馬」、11檔「秋月春風」同10檔「喜盈門」順序跑獲一至三名。當中「名馬」取得投告達理馬房後首捷，鞍上人呂卓賢今季亦告開齋，馬主羅焯一身白色西裝打扮，自去年1月同主的「如願以償」後，影番一張威水相。而告達理二仔Martin與女友Paris都有一起拉頭馬，十分甜蜜。
眾所周知，羅焯乃前大富豪夜總會老闆，靠經營娛樂場所致富，有夜總會教父之稱。近年隨住夜總會在港式微，羅焯轉戰內地，現時有唔少商業大廈揸手，比前更風生水起，不愧為有料之人。講番「名馬」，對上兩季都冇贏過，以為里程已盡，今季畀大告妙手回春，六歲馬呢日首次勝出直路賽，相反「秋月春風」上季至今五次跑第二，馬主仲未威過，可謂同人唔同命，「喜盈門」則跑第三。
羅焯表示「名馬」取得久違的勝利感到十分開心，告達理則謂今場贏在負輕磅，用呂卓賢減7磅，有利此匹腳患馬發揮。