【壹週刊】士丹頓街近PMQ的新店，以南美牛仔部族命名，主打燒烤扒類，牆上都畫滿牛仔主題壁畫，加埋高身枱櫈，雖然地方唔大，都幾有氣氛。
老闆兩夫婦本身開法國葡萄酒鋪近廿年，因為經常喺屋企宴請朋友，決定轉行開餐廳。老闆娘係越南華僑，曾經喺比利時同加拿大生活，由佢發辦的菜式，集合越南菜、東南亞菜、西餐，選擇豐富。
主角就係火山石燒烤，28安士的澳洲連骨斧頭扒，明火燒得好香，充滿肉汁。仲有藜麥沙律等健康菜式，唔怕只有啖啖肉的扒吃，女士們都有合適選擇。
呢度法國葡萄酒選擇多，年份頗齊，定價合理，由二百幾蚊一支至幾千都有。新店仲推出四小時任飲，逢星期一二5點至9點，任飲三款紅及三款白酒，飲足四個鐘，每位$228。
喺蘇豪區，一杯紅白酒起碼四五十元，同朋友飲酒傾計，來這裡坐足四小時飲足四小時，唔洗擔心埋單價錢，抵。
McGauchos
地址︰中環士丹頓街59號
電話︰2115 9736
iPhone版下載： http://goo.gl/1SDaWF
Android版下載： http://goo.gl/xfQS8D
壹週Plus網頁： http://nextplus.nextmedia.com/