【支援內地】
罕有接受媒體訪問的梁錦松，因身兼國際小母牛香港分會主席身份，就小母牛將於11月舉行的籌款活動，實行「小母牛上身」，穿着粉紅色小母牛T恤，接受本報專訪。他指出任該慈善組織主席職務已10年，他的感受是「幫到人係好大福氣」。
葉澍堃協助籌款
梁錦松指，「啲錢要用先算係你的，而幫人亦係用錢方法之一，同一般飲飲食食使錢法，有唔同體會」。
對於籌款活動正值「佔中」爆發，他也擔心因為「好多人冇心機」影響籌款成績；不過他慶幸有葉澍堃等好友協助籌款，他說：「佢係全世界最叻執行者……交嘢畀佢做冇甩拖！」
梁錦松自2005年出掌小母牛至今，10年內籌款額升20倍，每年籌得善款逾4,000萬元，百分百用於內地扶貧，累計協助5萬戶內地家庭脫貧。「7年前我哋捐咗兩頭母牛畀雲南一個農戶，當時佢哋年均收入不到1,000元；現時佢哋年均收入達1.8萬元，仲買咗3部車，包括一部拖拉機」。
小母牛向農戶捐贈畜牧三年，包括牛、羊、雞、豬、螢火蟲、蜜蜂。三年內一隻母牛會生兩、三隻牛仔，期限過後農民要將捐贈畜牧歸還，「歸還率達95%，窮人都好講信用」。
篤信基督的梁錦松，在訪問中不忘經常引用聖經，談天（上帝）說愛（關愛），問他多年來捐獻多少，他只簡單地答：「聖經講左手行善，唔需要畀右手知道」，意指行善積福，毋須四處張揚。
2009年受洗信奉基督教的梁錦松，承認信仰令他有所改變，「以前多啲想效率，點樣可以幫到更多人。
「現時就希望畀更多人感受到愛，老人家其實都好希望有人親身派飯畀佢，有義工帶佢哋去社區中心攞飯盒」。人與人的接觸，更能感受溫暖，並非單單得到一盒飯。
舊約聖經有十一奉獻教導（將收入的1/10捐獻），新約更超越完備，耶穌一生便體現「全人奉獻」精神。他深表認同，謂雖然自己始終是凡人，不能五餅二魚倍數衍生，但既然一切擁有皆來自上帝祝福，「捐嘅都係佢（神）嘅錢，就更加唔使肉赤」。