喺財經界，「股壇長毛」David Webb屬於高調支持佔中嘅一份子，佔中啟動冇耐，佢已經落場撐學生，之後不時喺自己facebook跟進佔中情況，前晚佢又落金鐘示威區，並發言叫狼英因應香港嘅真實情況再向中央提交報告，呼籲大家唔好再堅持公民提名，應該要求將提委會嘅提名門檻由50%回復至八分之一。
Webb在港生活23年，視香港為家，見到大批市民日夜瞓街爭取真普選，佢選擇參與其中。佢指，梁家傑與何俊仁分別喺2007年同2012年有份參選特首，就係因為提委會嘅門檻僅八分之一，呢個係合理嘅比例，中央現時將門檻提高至50%，等於大倒退。香港人要嘅係公平，佢建議中央可以放寬門檻，等將來嘅特首參選人有競爭。簡言之，香港作為金融中心，真普選先至對香港經濟發展有利。