旺角佔領現場自從有黑社會衝擊，加上警方涉嫌包庇之後，佔領群眾就想到一個方法，祭出關二哥鎮住個場。事關關帝義薄雲天，乃係黑白二道都奉為必拜嘅神靈，有佢喺度，個場就唔驚有古惑仔同古惑差，隨便話郁就郁啦！而由於拜關帝嘅人越來越多，香火鼎盛，位於彌敦道近旺角道嘅關帝神位，最近更加升格咗做關帝廟，就嚟可以申報做聯合國文化遺產㖭呀。
香港作為一個多元化嘅國際大都會，關帝出得來，中外諸神自然都相繼湧現。耶穌、土地公、觀世音菩薩，甚至「國師」陳雲，近日都分別出場，扼守住佔旺現場嘅幾個路障關口。
如果大家有興趣拜訪下諸神，不妨參考一下網民「蔡姬」製作嘅「旺角眾神位置手繪風格地圖」，包保有意外驚喜。