大家如有睇返上期專欄，都應該意會到筆者係好友，雖然唔係徹頭徹尾的大好友，但也算是較為偏好的較少數，標普上周四晚跌40點，上周五晚再跌20點，，我先前低位買落的利潤被削了一大截，更何況我高位有食唔食，仲再加碼，今鋪都可謂難玩。先前由於trade得好順，捉到市場節奏，24905睇淡做對沖，22600又睇返好，手風順，唔想做兩三番，四中全會前應有機會整鋪大四喜，點知現在為了做這鋪大四喜，供到人九張落地，遇到難題，無論對個市，還是對我，又係考驗既時候。
三個因素拖低大市
今次下跌，大家都將責任放在佔中或港府管治無方，但其實唔係咁簡單，就算以最概括的分析，最少都有三個因素，一、美股下跌；二、佔中；三、滬港通有機會延遲。上星期美股連續幾日大上大落，投資者的危機意識是提高了，風險胃納就相對減低。構成這種波幅的news，其實多數唔係甚麼新聞，好似話歐洲經濟放緩，講都講了幾年，點都消化了大部份在價內，而聯儲局若有若無的息口傾向，其實對港股來說，都只係舞高弄低嘅藉口，但最重要唔係一日一日的短走勢，而係幾個月以後的大趨勢，標普指數9月創新高後，轉眼10月已在試8月初的低位1904，最新造1906，無論小穿與唔穿，暫時似乎都無條件大散，皆因頂是圓的，反覆的8月9月徘徊在頂的時間唔夠耐，派唔切貨（細價股又作別論），所以呢方面不需要太擔心。
第二個因素，佔中的影響，只要大家睇睇滬綜指及恒指期貨兩幅圖，可以睇到9月以後兩者明顯的背馳，滬綜指向上恒指向下，我估同佔中唔多唔少都有關係，咁我見佔中人數日少，林鄭又咁有把握取消對話，心想應該係勝券在握，但很明顯，今次應該錯判了形勢，所以暫時處於下風。雖然如此，我仍然估清場在即，有睇周日梁振英在「講清講楚」的談話，講明港府仍在忍耐，但若周二周三，思嫣baby話私人執法呢？兩派人士起哄，我諗警方就點都要執法，所以周六周日及今天都唔高危，我亦只考慮將期指轉做call，但可沒算到周五標普續跌，目前只有先睇位做人，容後再談。
至於第三個因素，滬港通延遲，本來無佔中因素係唔會出現，因看到阿爺推行的力度十足，我雖仍估今日會宣佈執行，但都只係純粹斷估，這因素實太難測，若真的延遲，淡友肯定話係港股直通車的翻版，要先跌後升了。
政治市股票可以唔理住，但期指有槓桿，唔可以唔理，綜合三個因素，前兩個唔驚，第三個就唔識睇，故我期指上call只揸了原定的四成，如果今日跌穿頭20、30分鐘的支持，咁短線就先減，先避其鋒，等期指升穿23527，再瞓身，而長線就點止蝕呢？話明長線，揸咗幾日就止蝕？長揸喇！
張士佳