近年湧現唔少女馬主，講到養馬成就，當然以李嘉欣最威水，旗下「一寶」及「貳寶」上季至今夾埋贏四場，全部係高班賽事，更包括一場國際二級賽馬會短途錦標。
至於比嘉欣BB年輕好多嘅陳穎怡，喺養馬方面亦曾行好運，呢位貌似王菀之嘅80後獨生女，父親係建築業商人陳佛恩，穎怡話自己18歲已經喺馬場辦生日會，直言最初接觸馬匹時好驚，因為啲馬好大隻，嗰陣唔識同馬匹溝通，有時隻馬撲過嚟，自己會有啲怯，但佢匹愛駒「隨心隨意」其實好乖好生性，前季出道六戰取得五冠一亞，賽績超好，更成為最佳新馬及最大進步獎馬匹，更係該季葉楚航奪得冠軍練馬師嘅重大功臣。可惜吖，高峯過後「隨心隨意」上季全面謝晒，Q都未入過，全季只跑五場，3月中上陣後更因健康問題，至今已缺陣七個月。
好在「隨心隨意」畢竟有高質又有鬥心，經過一季低潮後，今季全面恢復操練，上月底試大閘，以極凌厲嘅後勁撲入第二，睇得出健康狀態已回復八九，今次降班跑最擅長嘅1400米，韋達成擔心機操練，相信穎怡今次重出江湖，一定做番齣好戲！