曼聯名宿白賴仁笠臣噚日訪港，為旺角麥花臣室內場上演嘅「俄羅斯航空亞洲盃」5人足球賽擔任主禮嘉賓。呢位紅魔傳奇7號仔喺席上大讚新7號迪馬利亞，仲講明睇好佢喺未來幾年成為曼聯最偉大嘅球員！
年屆57歲嘅笠臣，3年前因患上喉癌而辭任泰國隊教練，噚日佢以曼聯大使身份訪港就好友善，無論擁躉要求簽名定合照都來者不拒。講起效力咗13年嘅紅魔，呢位前英格蘭隊長即刻眉飛色舞，當中對新加盟嘅迪馬利亞讚不絕口︰「佢有速度又有射術，作為一個前7號球衣嘅主人，我都以佢為榮，相信佢未來幾年會係陣中最偉大嘅球員。」除咗「天使」，呢位鐵血隊長亦睇好現任隊長朗尼，認為佢脾氣改善咗唔少，有資格做紅魔同三獅隊長。
不過，講番成隊波，曼聯𠵱家排聯賽第4，呢位自認係過去20年最具代表性嘅曼聯兵都覺得球隊仲有排執：「雲高爾重建緊球隊，季初因為太多傷兵，後防仍有增兵需要。今季如果可以重返前4，踢到歐聯已經唔錯喇，下年先同車路士及曼城鬥過。」
見證大逆轉即抽紅軍水
講返噚日賽事，日本慶應義塾大學喺決賽落後3球下連追3球，最後仲憑12碼射贏北京體育大學，主持藉機問吓笠臣呢場決賽似唔似利物浦05年贏歐聯嗰場，點知佢即刻抽宿敵水︰「利物浦今年唔會贏歐聯囉。」
識睇，一定係睇足英台【英波Live】：
http://soccer.appledaily.com
http://bit.ly/engballlive