一臉稚氣的中學生、趕着買餸的師奶、勞累的扎鐵工人……36個人，36對澄明的眼睛，與數以十萬計香港人，撐起了無處不在的公民廣場、全新的香港。「未輸，唔准喊！」就像淹沒在連儂牆的小便條，不起眼，卻堅定如鐵，震撼人心。
記者：呂麗嬋 攝影：林亦非
守護學生只因感動
劉小姐
25歲 私家醫院護士
「男友話旺角危險，應該由男人去守護，叮囑我留喺金鐘，照顧學生。我喺醫院做嘢，同事大都係中產，之前，我同其他人一樣，好反對佔中，但喺電視，我睇到嘅，係最和平嘅抗爭，深受打動，所以決定企出嚟，支持學生。」
林鄭「呼籲」走出來
黃女士
52歲 退休清潔工
「我係7月2日被捕嘅511個示威者之一，事後收到警方發出嘅警告信，但呢啲，都阻唔到我守護學生嘅決心。已經連續兩晚喺金鐘過夜，噚晚返屋企沖涼，睇電視直播，聽到林鄭月娥嘅『呼籲』，好氣憤，忍唔住又回來了。」
不滿變形金剛染紅
Joe
30歲 玩具店老闆
「我最鍾意就係美國漫畫英雄，但係當你發現，連最新嘅一集《變形金剛》，都要為咗討好北京而染紅，我終於醒咗。喺現實世界，我決定走進佔領區，呢場已經唔止係學生運動，而係一場全民運動。」
兩年前曾畫黃雨傘
Tammy
40歲 插畫師
「兩年前我畫過一幅畫：兩個小孩撐着黃雨傘，𠵱家諗起，就似預告今日嘅一切。我永遠唔會忘記，學生帶頭重奪公民廣場嘅一刻，我喺現場，好震撼，連學生都咁勇武，我同自己許下承諾：一定要保護學生，所以，我留守到今日，共同進退。」