王晶與元彪是港產片最風光輝煌時期的中流砥柱，不過多年來在合作方面卻有緣無份，直到在王晶監製的新片《天師鬥殭屍》中，二人才真正有機會聯手拍攝電影。雖然二人到今時今日才有機會合作，但其實兩人相識多年老友鬼鬼，而且上至拍戲下至賽馬都無所不談，在訪問開始前已經不斷互笠高帽，元彪先說：「講電影梗係問晶哥啦！」王晶回他一句：「要演一代天師，元彪之外不作他選。」
撰文：文國駿
王晶與元彪日前為宣傳電影《天師鬥殭屍》，在奧海城戲院接受本報專訪，談到二人的淵源，王晶表示：「我記得嗰時我幫袁和平寫劇本，係由元彪主演，佢個角色幾突出。之後講番原來我爸爸（王天林）做導演時，暑假我跟爸爸做場務，元彪就喺袁和平師傅嘅隊伍，當時我哋已經見過。其實以前一路都想合作，不過有一部因為投資者褪軚，所以合作唔成，其實我哋都好熟，只不過係冇合作，但係跑馬、食飯都會見到。」
「鄭中基爆肚最正」
談到今次再以笑片包裝殭屍電影，王晶坦言電影的架構有點像以前的《殭屍先生》，他說：「大部份觀眾都仲係鍾意睇驚悚加搞笑嘅電影，好似以前《殭屍先生》咁，嗰時除咗林正英、錢小豪之外，許冠英係最唔可以缺少嘅一個，冇佢就好似冇咗個膽咁，所以一定要有人喺度搞笑，有番個喜感，今次呢個重任，我交咗畀鄭中基。」
元彪則表示與鄭中基合作非常開心：「佢好搞笑，開心果咁，而且有好多突發性演出，臨場加插，有特別又好反應嘅效果。」問到拍攝哪一場最特別？元彪透露：「有一場殯儀館殭屍翻生嘅戲最特別，我哋租咗真靈堂嚟拍，呢個堂拍戲，隔籬堂就做法事，拍出嚟個質感係唔同。」
「大製作靠大市場」
談到港產片的電影發展，近年有不少人指港產電影比起八、九十年代的黃金時期較為息微，王晶則有另一看法，他說：「我覺得冇乜嘢，最主要睇市場，我成日講九十年代港產片咁異常膨脹，係因為我哋有台灣支撐，佢保護香港片，不惜工本買，當時佢哋主要睇台片同港片，港片質素獨霸。𠵱家有更大更好市場就係大陸，香港只不過係稍為調整製作方針，93年我一年拍七部電影，今年就拍一部戲，成本係93年七部總和，所以好多嘢只係改變咗形式，同針對市場行為，絕對冇縮水。」他表示遷就內地市場不一定不適合香港人欣賞：「當然好典型嘅港片，大家會更入味，但如果我冇咁大市場，就冇咁大製作畀大家睇，所以一支針冇兩頭利。」
場地：the sky cinema
