波版食字乃常事，尤其波友多熱血、對球會忠義兩存，所以近日波版與佔領事件，有好多語帶相關標題，博君一笑兼打打氣。
最出位當然係某親建制報，足球版有曰「守護我城」，見球衣即知係曼城，呢啲粵語文字魔力簡直係香港獨有。
至於本報都有卧虎，小弟望咗幾日，都發現有標題「強勢『佔中』成功關鍵」，內文竟然係「佔中謂得中場得天下，車路士在英超季初暫時跑出，贏在中場整體威力大幅提升」，直線靚抽，遲吓可以加埋「提防左交失波」。另一個係「MK夠正氣『主勝』穩」，原來講英甲米爾頓凱恩斯（MK Dons），又畀你食到。再有「修頓3子向世界發聲」原來講修咸頓意大利射手加斯安奴柏利、英格蘭右閘尼達利基尼，以及葡萄牙中堅荷西方迪。最正就係「人才欠奉：『愛字頭』防線靠唔住」，明講愛華頓，暗講邊個呢吓？
美職聯蒙特利爾衝擊對新英倫革命，可以寫「撐革命抗衝擊」。阿甲學生隊當然必勝，小保加對羅沙里奧中央係「抗衡中央」（莫斯科中央陸軍都得）。歐國外奧地利對黑山當然係「大力抗黑」（黑池亦可）。多蒙特落場自然要「黃軍必捧」或者「黃之蜂暴」，有邊隊心水當然「瞓街支持」，防守力強者係「3路全封」，李斯特城輸波自然「斯焉敗走」，錫周三一定「周溶降班」，狼隊更加即時瓦解，仲要係「催淚推介」，港隊各師兄弟練好「金鐘罩」，抵抗一切球場暴力。
梁栢堅
填詞人+彩池人