有人話阿根廷係香港球壇稀客，其實過去30年，唔同身份嘅阿根廷起碼嚟過3次，次次我都歷歷在目，因為見識到球員腳法之餘，亦見證咗香港變遷。
1982年，32年前，小保加訪港，馬勒當拿風華正茂，不過當年嘅佢仲未去歐洲揾食，亦未踢過世盃，而入場嘅球迷，其實好多都係精工fans，當年佢哋球迷會個名就係叫做精工82，香港波如日方中嘅年代！當年屋企人冇帶我入場，作為一個初中生，我只係記得有位同學話馬勒當拿有腳波省中楣之後，個門框震咗成分鐘，當時大家嘅反應都係「嘩」一聲，係冇人懷疑呢位同學點解會震都睇到，可能細路都鍾意相信世上有超人啦！嗰一年，十大金曲有5首顧家煇作曲加黃霑填詞，有兩首歌名有中國兩個字。
同年大事，麥理浩卸任，尤德接任香港總督。
1992年，世界盃5人賽喺香港舉行，有阿根廷份，不過呢次佢哋真係配角，最好睇嘅當然係巴西，但最多人支持嘅就梗係香港隊。當時分組賽香港對阿根廷打得超好，仲領先過一陣㖭！因為呢個5人賽，香港仔都曾經好自豪係踢街場大，細場先練到腳法㗎嘛！至於啱啱做緊兼職記者嘅我，就好高興有機會第一次喺紅館睇到人踢波！嗰一年，10首勁歌金曲全部情歌，其中7首由4大天王包辦，如果Beyond喺1993年嘅《海闊天空》早一年出的話，分分鐘入唔到十大。
同年大事，衛奕信離任，最後一任港督彭定康抵港履新。
2001年，阿根廷青年軍嚟踢4角賽，由於同其他比賽撞期，最紅嘅沙維奧拿冇嚟， 之但係有教父級教練比格文帶隊。當年最多球迷打氣嘅，係中國隊喎！呢次，我請纓做咗阿根廷嘅導遊，帶一班小朋友去皇后碼頭搭小輪過海，再轉巴士去旺角買遊戲機！佢哋買到平嘢個笑樣，仲開心過捧盃嗰陣。嗰一年，全香港人唱《Shall We Talk》嘅好多，真係傾嘅恐怕好少。
同年大事，政務司司長陳方安生提早退休。
2014年嘅今日，阿根廷又嚟嘞，歷史待續。
KEYMAN
節目主持 電郵：mailto：[email protected]