嗚呀！許Sir唔見咗呀！噚日八方有得去警總記招，諗住有得現場睇「四點鐘許Sir」啦，點知一去到門口，警察公共關係科嘅後生阿Sir就笑笑口話：「今日冇許Sir。」八方即刻好肉緊問點解，殊不知耳邊傳來一句，「或者我再重申一次，今日冇許Sir。I will now recap in English, today no Hui Sir」。禿鷹已經唔見一排啦，許Sir唔通又俾人放入雪櫃？
江Sir頂替 冇咁趣致可愛
入到記招房，有行家悶悶不樂咁話：「已經冇得睇《放學ICU》㗎啦，點解連許Sir都冇埋。」又有電視台行家擔心，冇咗許Sir，唔知直播收視會唔會急跌，警隊士氣恐怕受打擊……Madam就安慰大家，「今日有江Sir」，即係警察公共關係科高級警司江敏強。Madam話呀，許Sir只係唞吓，唔係病咗。後來另一Madam又話，許Sir噚日有返工㗎，但有其他嘢做。
準時四點鐘，江Sir同馬路的事李Sir、陪你談數據梁Sir齊齊現身。只見江Sir身形纖瘦，冇許Sir咁趣致可愛、連嗰句「各位傳媒朋友大家好」都冇埋。不過，江Sir同許Sir一樣，十足人肉錄音機，無論問乜，都係強調佔領行動係非法行為。記招尾聲，動記同事用英文問，點解唔見咗許Sir，阿江Sir就用純香港口音英文話：「I'm sure that you will still have chance to meet Mr. Hui in the later days（我肯定你哋第日仲有機會見到許Sir）」。
李八方
mailto:[email protected]