近來聽到「黑」，驚；「膠」，仲驚。但當黑遇上膠，化學反應隨唱盤輕送，聽過以後，鋪癮從此搣唔甩。黑膠唱片是舊時代產物，近年卻大發神威狂收八十、九十後新兵。台灣誠品七辦黑膠節，已集結成旋風，今年首捲香港，規模未能同日而語，但作為入門初體驗，足矣。
記者：葉青霞
攝影：潘志恆
黑膠唱片零舍不同，不論是來自凹凸坑紋的觸感，抑或聲音的輸出。資深樂評人袁智聰將於黑膠節大談與黑膠的緣份，更會即席播放精選十大。珍藏數之不盡，篩選，令他好糾結。陪伴他成長的德國電子流行音樂先鋒Kraftwerk的《Autobahn》屬「無慮即播」之選。講座當日大家可帶同心頭好跟他交流一番。
沏功夫茶，名副其實工夫多，但回甘滋味又令人神往。袁智聰認為聽黑膠碟道理相同。「樽裝茶係方便但唔夠好飲嘛，正如數碼版歌曲味精重，tune到粒粒音都好sharp。黑膠相對organic，較接近原音。而且㩒個掣有歌聽，冇過程，邊及得上放碟、擺唱針，看見唱針劃過坑紋再發聲咁有實感。」
去年音樂界有個統計：CD銷量及歌曲下載量均跌，反而黑膠唱片逆市造好。黑膠復興非粉絲亂吹。「唱片業都在迎合這股潮流，新碟紛紛出黑膠版。電影也經常出現主角聽黑膠的情節。」聽黑膠首要交學費，市面有些唱盤千多元已有交易。「入門唔錯，玩玩吓你會有要求，就會換。」強調一旦愛上，就回不了頭。
自己唱盤自己做
為期一個月的黑膠節有一籃子節目，下星期五晚的開幕禮，將有本地獨立樂團拉闊表演。除了袁智聰，誠品還找來珍藏30萬張黑膠的歐德成分享60至70年代專輯；唱片店老闆阿文及音響店老闆Eric對談論盡黑膠，並放送爵士與古典樂。另搜羅近萬張中西二手經典與新版黑膠，供大家抬回家細聽。本地手作黑膠唱盤設計單位LAB by Dimension+將於店內策劃《聲的形態》創作展，又一山人、梁基爵等19個單位以其唱盤為繆斯，把聲音形象化。自己唱盤自己做，LAB by Dimension+還會開班授徒，木造質感加上親手製作，聽黑膠從未如此浪漫過。
同場加映：音樂人電影
同期播放三齣音樂人電影，包括傳奇歌手Sixto Rodriguez的紀錄片《尋找隱世巨聲》（圖）、古巴國寶級樂團的《樂滿夏灣拿》及改編自John Lennon妹妹回憶錄的《約翰連儂：不羈前傳》。
誠品黑膠節
日期：17/10-17/11
地址：銅鑼灣軒尼詩道500號希慎廣場9樓誠品書店
網址： https://www.facebook.com/eslitehk