泛民話明呢屆立法會玩不合作，噚日內務委員會改選正副主席，立即出現「第一拉」。原本經民聯梁君彥係必定成功連任，不過梁君彥獲提名後，大嚿陳偉業開始玩「拉布」：先擺公民黨湯家驊上枱，推選佢做主席，湯家驊梗係唔接受，跟住大嚿就陸續提名元秋蔣麗芸、工聯會王國興、新民黨田北辰、工業界林大輝，一味拖時間，最好笑係田二少拒絕大嚿好意理由係「第五個先諗起我，唔好喇」。
呢個時候，人力陳志全亦玩埋一份，提名長毛，長毛欣然接受，仲話佢嘅政綱係會做足手續，開會打定電話畀習近平、張德江、狼英同林鄭，總之「上通天庭，下落地獄」，仲話取消㩒制投票，改為人大式鼓掌通過。估唔到最後長毛都有14票支持，而內會副主席無意外地由湯家驊做番。