進入亞視官網查看藝人欄，男藝人認識無幾個，第一個能夠喊得出名字的應該是劉錫賢（肥仔賢）吧！肥仔賢服務亞視25載，一向靠200磅噸位搵食，有演技又有口技。身兼多職，演員、司儀、導師，真是多功能兼好使好用，無奈亞視近年走下坡，下月更面臨一個有史以來最嚴峻的考驗，結果是「香港可能會冇亞視」。
續牌陷危機，不過肥仔賢仍然硬着頭皮盲撐亞視：「我絕對有信心，我覺得暫時冇電視台可以取代亞視，雖然有好多負面消息同講法，始終香港需要亞洲電視，好多時有突破友台嘅嘢做，就係我哋夠膽做，佢哋唔夠膽做，包括𠵱家友台余總監（余詠珊），佢喺亞視做咗好多嘢，過咗隔籬台就唔夠膽做，所以我哋電視台係做一啲人哋唔夠膽做嘅嘢！」
曾患上情緒病
在亞視歷史巨輪下，改朝換代屢見不鮮，最近亞視亂局不穩，肥仔賢可會想起從前？他說：「每個朝代都有開心唔開心，譬如林伯（林百欣）嗰時，佢係一個好關心員工嘅老闆，跟咁樣嘅老闆梗係開心㗎！封小平年代，佢好尊重創意同埋尊重每一個演出，亦有其他老闆開發唔同嘅嘢，每個朝代都有好有唔好。我只可以咁講，亞視係一個充滿回憶嘅地方，對我來講係輕舟已過萬重山。」可惜往事亦只能回味。
亞視長老劉錫賢，25年並非無風無浪，在2011年他一度患上情緒病，多次進出醫院，肥仔賢還以為自己會死，他說：「我患咗初期情緒病，𠵱家好番晒，冇食藥，用自己意志去醫治，成班朋友話我冇伴，叫我快啲搵番個老婆，仲介紹個人畀我識，一年就結婚，都係虛驚一場，我其實做嘢冇乜壓力，做人又逆來順受，呢個係我做嘢嘅宗旨，最重要係邊度搵我，時間啱我咪做邊度。」
開班訓練新血
近年亞視減少製作又冇開拍劇集，忠臣劉錫賢只好心在亞視身在外，他笑說：「一路以來，出面好多工作，基本上都冇停過，近年心境和體力上有啲唔同，開始想參與幕後同策劃性工作，要花更加多時間，但係我澄清我唔係唔做亞洲電視嘅嘢，亞視要求做乜嘢，我一定做。」
亞視可貴的地方是給予藝人自由度，肥仔賢珍惜現在，同時亦計劃將來，他說：「喺出面做舞台劇同埋登台做騷，𠵱家仲搞緊個訓練計劃，訓練一班小朋友做電影電視製作，培訓幕前幕後嘅下一代，配音同動畫就聯絡緊一啲導師，佢哋肯拎啲時間出嚟去一啲社區中心度教，畀啲演出機會佢哋。喺內地方面亦有一個小朋友訓練計劃，同內地啲團體做培訓課程做校長，𠵱家開始年紀大，係要諗一啲新發展方向。」