國慶黃金周假期正式完結。埋單計，七日整體內地旅客數目按年增長6.8%，冇想像中咁差，但又稱不上是好。無論是比較去年還是8月份的數據，均出現顯著放緩，符合黃金周原本「一年不如一年」的走勢。
據業內人士所講，是次增長主要係受旅行團帶動，反而自由行旅客的升幅較低。內地政府自10月1日起停辦新增來港的旅行團，由於黃金周旅行團多數早一個星期前已安排好晒，所以短期打擊唔大。不過，如果「禁令」繼續延長，影響可能遲一排就會浮現。
據莎莎（178）公佈的黃金周數據，港澳地區期內銷售按年跌1%，好過市場原本預期的高單位數跌幅。值得留意的係，來自內地客的生意其實唔算太差，反映客流的交易宗數按年增長超過一成，只是被平均單價下跌所抵銷。反而係香港人自己冇乜心機「濕平」，本地客生意按年下跌6%。
綜合上市零售公司所透露，佔領運動對該區生意的影響，大概為10%至30%，非佔領地區大都維持增長。除非內地對香港旅遊政策出現重大轉向，否則拉勻全年來睇，佔領運動對財務影響應該輕微。不過，咁唔代表香港零售已經見底，旅客增長放緩、消費力下降等問題，似乎仍沒有轉勢的迹象。或者年尾市況會有點好轉，但長遠泡沬要消退，調整仍在所難免。
海迪