近期唔少有資本動作嘅股仔都大爆，特別係供完股後都相繼飛天。剛於噚日公佈供股結果嘅中國仁濟（648）就好有追捧價值，新金主兼剛上任為董事局主席嘅陳嘉忠，每股入場成本都要0.386元，佢手持嘅另一批非上市認股證，行使價亦為1.004元，所以有理由以呢個價為中線目標。
唔講唔知，其實中國仁濟舊年中開始已有易手痕迹，其時集團向陳嘉忠批售大批認股證，股本經20合1後，涉量折合最新為1.35億股，認股證買入價0.004元，以各半分為兩批，首批行使價0.44元。微妙之處係，陳兄於集團宣佈供股後便行使咗首批認股證共6,700萬股，再以2供1、每股供0.27元計算，陳兄嘅每股入場成本為0.386元，暫時成為持股近一成嘅新金主，佢手上仍持另半認股證，定價每股近1元嘅行使價，心意已相當明顯。
陳兄喺最近升為主席，仲帶埋兩個新董事入局，三人都喺環保、創新科技、潔淨能源、化學品及食品行業方面有豐厚經驗，同家陣中國仁濟做緊嘅醫院業務完全唔同，好明顯，應該係仁濟大變身嘅伏線。供完股後，中國仁濟每股NAV為0.48元，數埋嘅手頭現金，足足每股近0.338元，現市值僅4億銀，似代表另一隻新星已經誕生！
古道祥
本欄逢周五刊出