點樣可以做到首富嘅女人呢？除咗能幹、識大體，唔怕肉麻、公開表達對對方仰慕之情可能都係其中一招，「超人」李嘉誠嘅紅顏知己周凱旋就做咗一個完美示範。
話說唔夠半年，周凱旋再次幫維港投資搞巡迴展覽。佢噚日喺上海致辭時，竟然毫不避忌咁向超人表達仰慕之情，將超人比喻為唐吉訶德咁有俠義心腸，仲話超人有份「忘我的熱情」，而佢自己「能做好隨從桑丘已經好唔錯」咁話，肉麻到不行。
周凱旋透露，佢寫字樓牆上掛住一幅由畢加索畫嘅《唐吉訶德》，周凱旋30年前花20法郎喺巴黎買呢幅複製品，事關佢細路女時就好鍾意西班牙作家賽萬提斯喺1605年出版嘅《唐吉訶德》，欣賞故事中騎住老馬到處行俠仗義嘅唐吉訶德。佢又暗喻超人要做教育改革、支持醫療服務同科研係書中提到嘅「大戰風車」，屬唔可能嘅夢想，崇拜之情溢於言表。