美元本周終於腳軟，表面係因為聯儲局會議紀錄暗示唔會咁快加息，實情是連升12周後，好消息已經炒得七七八八，好友收夠籌平倉食糊先。由於聯儲局10月底議息冇記招，意味係年尾最後一次議息前，加息話題都難有突破發展，要是美債孳息繼續徘徊於近日低位，美金短期可能進入牛皮市。
油價積弱 加幣未脫險
值得注意的是，美國上周五公佈9月新增24.8萬職位，失業率出乎意料降至5.9%，刺激美元當日彈上四年新高。不過聯儲局內部鷹鴿兩派連日繼續唱對台，已連升12周嘅美元周初已呈疲態。當聯儲局周三公佈的會議紀錄顯示，理事嘅焦點轉移到憂慮外圍經濟及強美元影響復蘇，市場解讀為聯儲局又搬龍門，對加息繼續採取拖字訣，美元終於要洩氣。
美滙指數早前升至86.7四年高位後，昨日險守85，回吐近2%，而早前跌得越甘果啲，反彈幅度就更大。以彭博追蹤的16隻主流貨幣為例，商品貨幣反彈力度最強。截至昨日執筆為止，巴西雷阿爾及南非蘭特本周反彈逾3%；澳元和紐元緊隨其後回升逾2%，分別逼近89美仙及重上79美仙。加元上周跌穿1.12兌1美元的七個月低位後，本周跟隨大市反彈，昨日處於1.11邊，但油價短期仍處弱勢，不排除短期下試3月低位。
德國數據連衰三日，工廠定單、工業生產以至出口表現，都係幾年來最差，但受惠美元走軟，歐元早前挫至1.25美元後已跌唔落，昨日曾逼近1.28。上周失守1.6嘅英鎊亦類同，近日喺1.62美元上落。強如美元兌日圓呢個熱門師奶盤，衝破110日圓嘅大位後亦出現強大阻力，昨日喺107日圓浮沉。
除了加息預期降溫，美債息跌亦是美元回落催化劑。自聯儲局年初開始縮減買債後，市場對環球主權債及垃圾債市場開始有戒心，所以呢類資產近月表現麻麻。然而由於聯儲局傾向維持低息嘅立場仍未動搖，加上IMF唱淡歐洲和日本經濟，為美債價格帶來強大支持，10年期國債孳息昨日跌至2.28厘，創15個月低位，亦是美元走軟的因素。
聯儲局10月29日又議息，如無意外將宣佈下月結束所有買債，代表聯儲局資產負債表不再膨脹。根據聯儲局網頁顯示，金融海嘯以來，隨着儲局不斷印銀紙買債，其資產負債表已由QE前的8,000億美元暴升逾四倍至4.4萬億美元，全個世界亦靠呢幾萬億救命錢渡過難關，避免陷入大蕭條，聯儲局一旦開始收回呢啲「救命錢」，對市場的影響不容忽視。不過，儲局早前已暗示無意在加息前縮細資產負債表規模，以市場預期儲局明年下半年開始加息計，暫時都唔使驚住。
奇兵
本欄逢周五刊登