馮仁昭四圍超:伊健小春遊埠競技鬥采兒 - 馮仁昭

馮仁昭四圍超:伊健小春遊埠競技鬥采兒 - 馮仁昭

鄭伊健同陳小春呢對古惑仔再闖江湖,得到深圳衞視邀請參加綜藝節目《極速前進》,去咗紐約同印度拍外景,呢個節目要參加嘅明星走遍世界各地進行遊戲競賽,8組入面睇吓邊組會贏,伊健同小春編成一組,小春老婆應采兒就同內地女星劉雲一組,原本製作單位想畀佢兩公婆一組,但佢兩個覺得唔係咁好,所以寧願分開玩。
為突出伊健同小春嘅古惑仔形象,兩個人各自揸電單車、着住黑皮褸、戴黑超出場,伊健話:「同小春拍完《古惑仔》後,已經有成20年冇對住咁長時間一齊做嘢,因為要去5個唔同國家參加比賽,我同佢一定要好齊心先至可以贏得冠軍,之前去咗紐約同印度,下一站會去杜拜同希臘。」

伊健同小春去到印度放低包袱,好鬼認真咁玩大會安排嘅遊戲項目。

伊健(左)、小春(右)

赤腳跑 馴服牛

幾個競技遊戲當中,伊健同小春印象最難忘係赤腳喺印度街頭喪跑,後來又要騎喺野牛上面馴服隻牛。咁都未夠,各隊明星仲要頭頂一個漏水嘅魚籃去街市賣魚,賣晒啲魚先叫贏,攝製隊都諗唔到伊健同小春玩得咁投入,兩個人求勝慾真係好鬼強。
撰文:馮仁昭