威華達（622）將非核心業務，清得就清，家陣最大撼嘅資產，係手頭超超多現金同埋金融資產，可塑性越嚟越高。
威華達剛啱喺周二公佈，出售陶瓷絕緣體業務。雖則，呢壇製作總代價區區4,550萬元，獲利11萬元咁大把，但呢瓣項目，係威華達手頭唯一一項非核心業務，經出售後，剩番證券金融業。而集團資產當中，淨現金高達13.4億元，係總市值18億元73%；又若果連埋一批高流動金融資產16.6億元計，總值達到30億元，係相當於威華達總資產值36億元嘅83%。
超級現金牛待發圍
睇到係，威華達除咗係超級現金牛，集團將非核心業務出售，有啲清得就清，成間公司變得乾乾淨淨嘅味道，可塑性仲高！
又之前講過嘅係，喺嚟緊嘅日子，估計威華達有兩條路走，一係，就食住中港股市未來大融合，將證券業發大嚟搞。而集團超級現金牛，加埋大股東歐亞平，又係三馬（馬雲、馬化騰同馬明哲）眾安保險嘅掌舵，有好大優勢。又或者，威華達大派息，再變身或者賣殼。而若果以威華達將所有淨現金派出街，用除息效應去計數，集團市值縮到得番4.9億元，啱晒搵殼人士嘅胃口。兩條路數，同樣有利威華達。
咪扯咁遠，券商股經過呢期盤整，隨住滬港遲早通，相信又會成為熱炒焦點，遲早會嚟料。
又威華達家陣PB得0.44倍，場內第一上海（227）0.83倍PB、南華金融（619）1.3倍，時富投資（1049）0.85倍，威華達平咗一半。買威華達，現價（0.25元）當翻半番到0.37元，PB先得0.64倍；又威華達PB，要追到上時富同第一上海水位，係講緊要升80%。
錢雋
細價股專家
本欄逢周二、三、五刊出