誠如戰友咖喱所言，柏天尼擴大歐國盃對小國係德政，其實對強國（唔係講緊偉大嘅祖國）何嘗唔係好事。踢完世界盃後冇幾耐，歐洲國家又要出戰外圍賽，成績好嘅球隊要諗吓點樣延續強勢，成績差嘅球隊就要諗吓點換血。世界盃分組賽出局嘅西班牙，亦都趁機會大換血，教練迪保斯基真係要多謝柏天尼。
坦白講，個人對迪保斯基（圖）嘅評價唔係好好，係就係帶皇馬同西班牙贏過好多盃，但其實冇咩個人戰術風格。迪帥領軍最大好處就係等一班大牌球員可以融洽咁一齊踢，帶皇馬搞得掂費高、施丹、朗拿度等星，但其實好多時都係等班星自己搞掂場波；西班牙亦都係呢種風格，食正巴塞盛世，加入皇馬球星，基本上狂牛唔內訌，實力已經係數一數二。
迷信係迪保斯基最大毛病，之前贏波嘅方程式唔肯改，到巴西世盃都仲帶費托去，正選仲畀卡斯拿斯，就證明佢有問題。到巴塞老本食得差唔多，先開始着手西班牙換班，好彩西班牙青訓仍然好強，迪基亞、佐治高基等立即接到班，如果唔係皇馬浪費艾斯高同伊拿拉文迪兩大新星，西班牙更加唔使愁。講真以C組實力，西班牙最強對手都只不過斯洛伐克、烏克蘭，真係半力都夠出線，迪保斯基大把機會培訓新人，今輪又睇吓華倫新人洛迪高摩連奴有冇貨交。
文：牽牛