國泰航空（293）行政總裁（CEO）朱國樑早前提過政局不穩會影響客運生意，公司上星期又提醒空中服務員唔可以穿上制服戴黃絲帶，疑似打壓同事支持佔中，但噚日中午，朱國樑被人發現喺佔中重地干諾道中出現，唔通又係一個「身在曹營心在漢」嘅例子？
空姐黃絲帶掛行李篋
聽國泰嘅空姐朋友講，國泰管理層除咗提醒空中服務員要跟從制服指引規定，唔好着住制服戴黃絲帶，呢兩個星期亦有搵寫字樓嘅同事企喺登機閘口，好似學校風紀咁，望一望空中服務員着成點，確保佢哋冇戴黃絲帶。
不過，所謂「你有張良計，我有過牆梯」，制服指引只係講制服，冇提隨身物件，有空中服務員就走灰色地帶，將黃絲帶掛喺行李篋，點都要表個態。
至於國泰CEO朱國樑點解會喺佔中示威區出現呢？聽講，朱總噚日朝早冇返機場國泰城返工，去咗母公司太古A（019）喺金鐘嘅太古廣場開會，佢之後約咗人喺中環食晏，於是開完會就行過去中環。
其實，如果朱總想要避開示威區由金鐘行去中環，可以由太古廣場經香港公園或者金鐘廊行過去，再唔係，搭一個站地鐵過去都得。
佢專登走過去干諾道中行過示威區，唔怕令人誤會佢想表態支持佔中咩？定還是，佢只係八八卦卦想去睇下嗰邊點環境，實行「到此一遊」？不過，最重要係，朱總感受過示威區嘅氣氛後，會否對黃絲帶採取寬鬆態度呀？
李華華
mailto:[email protected]