如果話社民連梁國雄係建制派殺手，其實一啲都唔過份。長毛噚日一出手，就辣到民建聯陳鑑林㷫㷫哋，就算之後陳鑑林想向長毛還拖，都俾黨友出手阻止。噚日工務小組選正副主席，泛民憑住早前突襲搶灘成功，先由公民黨梁家傑輕取主席之位，輪到選副主席嘅時候，派民主黨胡志偉出征，坐定粒六等當選。建派制則由經民聯盧偉國屢敗屢戰。點知長毛突然舉手話要提名陳鑑林參選，被玩嘅陳鑑林即刻斷然唔接受。之後陳鑑林主持交通事務委員會並改選主席，佢叫秘書收番啲選票時，長毛又話投錯票，要攞張新選票投過。心裏有火嘅陳鑑林唔制，但點知連佢黨友Tree根同陳恒鑌都示意放行，就連秘書都為咗個會暢順啲，話不如畀番張票長毛啦！再次被長毛K.O.，陳鑑林唔嬲就假咯！